Maar die Woord van die Here, dit bly vir ewig. En hierdie Woord is die Evangelie wat aan julle verkondig is.

1 Pet. 1:25.

Briewe
Gedigte
Vra vir Val
Stemmings
Skrywersriglyne
Sosiale Netwerk
Gebeure & Konferensies
Kompetisies
Gratis Nuusbrief
View March 2010 Issue >>
 

Stormie Omartian

Sy is sonder twyfel die bekendste skryfster oor gebed en haar boeke verkoop soos die spreekwoordelike soetkoek. Sy is iemand met vele talente – sy sing, sy dans en sy is ook ‘n bobaaskok. Stormie Omartian het aan JUIG! ‘n eksklu­siewe onderhoud toegestaan tussen die verskeie sperdatums en afsprake deur.

HET JY IN 'N CHRISTENHUIS OPGEGROEI?
Ek is seker albei my ouers het in God geglo, maar hulle het nooit kerk toe gegaan nie. My ma sou my soms, miskien een keer per jaar, kerk toe neem. Dit was gewoonlik òf Kersfees òf Paasfees. Toe ek 14 was, het my ma ‘n groot familiebybel gekoop en ons twee het omtrent vir ‘n jaar lank gereeld kerk toe gegaan.

Toe, ewe skielik, het sy die Bybel weggegooi en dit was die laaste keer dat ons ons voete in die kerk gesit het. Ek het my ouers nooit sien bid nie – om nie eens te praat van wedergeboorte of ‘n persoonlike verhou­ding met die lewende God nie! Maar ek glo hulle is in die hemel omdat hulle in God geglo het.

WANNEER EN HOE HET JY JESUS AS VERLOSSER EN SALIGMAKER AANGENEEM?
Omdat my ma geestelik siek was, het ek met baie fisieke en verbale mishandeling grootgeword. In my vroeë kleuterjare het sy my gereeld in ‘n kas toegesluit. Ek het dus as hartseer en depressiewe mens opgegroei. Ek het met angs en vrees gesukkel. Namate ek ouer geword het, het my depressie vererger. Ek het alkohol en dwelms gebruik en by die okkulte betrokke geraak, maar niks kon daardie toestand wegneem nie. Op 28 het ‘n vriendin my geneem om haar pastoor te ontmoet.

Hy het my drie boeke gegee om te lees: een oor die krag van die Heilige Gees; een oor die werklikheid van die bose en die laaste was die Evangelie van Johannes in boekvorm. Na ‘n week is ek terug na hom toe en op sy vraag het ek geantwoord dat daardie boeke die Waarheid bevat. Ek het Jesus daardie dag in sy kantoor aan­geneem.

HET JY DAAGLIKS 'N SPESIALE TYD WAT JY AS PERSOONLIKE GEBEDSTYD OPSY SIT?
Ek probeer om so vroeg as moontlik elke dag te bid. Ek bid ook deur die dag oor wat ookal oor my pad kom – terwyl ek kook, iewers heen ry, terwyl ek opwaswerk tuis doen. Daar is so baie dinge om oor en voor te bid. Indien ek dalk vroeg iewers heen moet vlieg, bid ek gou as ek opstaan, maar ek probeer dan om gedurende die dag tyd te vind om in Sy Teenwoordigheid te verkeer. Ek spandeer ook altyd my tyd op vlugte deur my Bybel te lees en te bid.

JY HET EENS MET DEPRESSIE GESUKKEL EN HET DEUR 'BEVRYDING'GEGAAN. KAN JY DIé 'PROSES' AAN ONS LESERS VERDUIDELIK? DINK JY BEVRYDING IS NOODSAAKLIK OM LOS TE KOM UIT BINDINGS WAT IN 'N PERSOON SE LEWE MAG WEES?

Ek het met depressie gesukkel solank as wat ek kan onthou, selfs nadat ek Jesus as Verlosser aangeneem het. Ek kon nie verstaan hoekom dit vererger het nie. My man het voorgestel dat ek die beradingspan by die kerk besoek. Daar was uitstekende vroulike Christen-beraders wat die Skrif goed geken het, sterk in geloof gestaan het en die gawe gehad het om mense in God se Naam vry te maak. Nadat ek alles wat in my lewe gebeur het aan my berader, Mary-Anne, vertel het, moes ek 3 dae vas en bid. Sy sou saam met my vas. Na drie dae is ek terug na haar kantoor toe en ek moes al my sonde bely, veral my betrokkenheid by die okkulte.  Ek het dit lankal nie meer beoefen nie, maar het dit nog nooit as sonde voor die Here bely nie. Ek moes ook my onvergewensgesindheid teenoor my ma bely.

Daarna het die Here met my deur die berader gepraat: “My kind, jy is jou hele lewe in ‘n kas opgesluit - fisiek en emosioneel – maar Ek het die sleutel.” Mary-Anne het gebid dat ek sou vrykom van depressie en die oomblik toe sy dit gebid het, het ek letterlik gevoel hoe die depressie lig.

Van daardie dag af het ek nog nooit weer daarmee gesukkel nie. Ek sê nie hiermee dat ek nooit weer daarna ‘af’ gevoel het nie, maar depressie het my nooit weer daarna beheer nie. Ek kon Hom daarvoor prys! Dit is vir elkeen van ons ontsaglik belangrik om vry te kom van dinge wat ons verhoed om in Sy Volheid te leef.

JY HET 10 'GEBEDSBOEKE' GESKRYF. HOEKOM IS GEBED SO BELANGRIK?
Tydens my bevryding het ek besef hoe kragtig gebed is. As Hy dit vir my kon doen, wat kon Hy nie nóg in my lewe doen nie? Ek en my man het groepleiers by ons kerk geword en ‘n selgroep tuis gehad. Michael het die sang en die boodskap hanteer en ek het die gebed behartig. Daar was elke keer so baie gebedsversoeke dat dit nie alles in een aand kon inpas nie.

Ons het later een samekoms per maand nét vir gebed gehad. Dit was so gewild dat ons dikwels tot eenuur, twee-uur in die oggend gebid het. Ek het toe ook ander groepe begin – om vir kinders, getroude pare, mense in die bediening, ens. te bid. En dit is waar my gebedsboeke begin het: dis gebaseer op wat ek tydens daardie wonderlike gebedstye geleer het!

WAT IS VIR JOU DIE GROOTSTE UITDAGING IN JOU BEDIENG?
Liggaamlike swakheid, veral noudat ek ouer word. Ek het net nie meer die stamina en uithouvermoë om te doen wat ek moet nie. Veral die reis is uitputtend, maar God se Genade is groot en Hy help my telkens.

KAN JY VIR ONS 'N PAAR PRAKTIESE WENKE GEE HOE PAARTJIES SAAM KAN BID?
Dis eenvoudig: gaan sit net saam en bid. Baie paartjies doen dit nie omdat hulle verleë of selfbewus voel om in mekaar se teenwoordigheid te bid. Hulle voel dalk hulle moet net so goed en ‘verhewe’ bid soos die predikant of pastoor.

Hulle voel hulle kan nie met God in ‘gewone’ taal praat nie. Dis nie waar nie. Gebed is tog om jou hart voor God te ontbloot. Jul­le sal ook vind dat as julle saam bid, julle verhouding intiemer word – julle word al hoe liewer vir mekaar juis omdat julle sáám jul harte voor Hom oopmaak.

WAT, NA JOU MENING, IS DIE ROL VAN DIE CHRISTENVROU IN DIE MODERNE SAMELEWING?
Christene, mans en vrouens, is baie belang­rik. Mense besef nie wat die krag is wat in gebed van Christene opgesluit lê nie. Christenvroue veral, moet die lig wees wat mense nadertrek en aanmoedig om die Here te soek.

Ek dink dat veral vrouens wat baie tyd in gebed deurbring, ‘n liefde vir God het en daarom bereid is om diensbaar te wees. Ek glo elke vrou het ‘n roeping om in gebed in te tree – soos Ester – sodat dié wat in die wêreld om haar leef, gered kan word.

ENIGE NUWE BOEKE IN DIE VOORUITSIG?
Ek is altyd besig om te skryf, altyd besig met ‘n nuwe projek en dit maak my die gelukkigste. Ek geniet dit. Daar is drie boeke wat in 2010 verskyn – ‘n kinderboek God Cares About the Way I Feel,  ‘n ‘kort’ boekie Ten Minutes to Powerful Prayer, en dan ook The Power of a Praying Life. Die nuutste boek wat tans op die rak is, is The Power of Praying for Your Adult Children. Dit is voorwaar ‘n uitdaging om vir volwasse kinders te bid, enigeen in dié situasie sal weet.

BEPLAN JY 'N BESOEK AAN SUID-AFRIKA  IN DIE AFSIENBARE TOEKOMS?
Ek het SA in 1967 besoek – die jaar toe die eerste hart oorgeplant is. Dit is ‘n pragtige en fassinerende land en die mense is warm en vriendelik. Ek wou al weer kom besoek aflê, maar die lang vlug asook die feit dat my dagboek so lank vooruit so vol bespreek is, verhoed dat ek binnekort daar sal uitkom.

Tel: +27 (0)21 852 4061 Faks: +27 (0)21 852 5781 Epos: info@juig.co.za

Tuisblad | Oor ons | Nuutste Uitgawe | Vorige Uitgawes | Adverteer | Advertensiegids | Inteken | Gedigte | Briewe | Sosiale Netwerk | Stemmings | Kompetisies | Gebeure | Nuus | FAQs | Skakel Ons | Terme en Voorwaardes |
Privaatheidsbeleid

English? Click here for our sister publication