Het jy geweet Geloof 
kom na Loof?
Ek wed jou jy’t gedink
dis andersom

 Ek het gesteier
onder die vrag van elke dag
die beeste-van-Basan
probeer ontwyk
Gesug oor die kurksmaak,
die uitsiglose vaalheid van
net-maar-bestaan
Ek het magteloos geroep
gevangene in hier-en-nou

Padwyser in ‘n doolhof
Kom wys die rigting aan:
Iemand praat met ondervinding
Die oplossing so eenvoudig -
 
Loof God
Net dit
Vir Wie Hy is
Vir wat Hy kan

Ten spyte van Basan
Of juis as gevolg daarvan

 Hy leer dat God geniet
nietige lofsange van
simpel ek en jy
Dat HY daarin kom woon!

 Dan doen Hy iets
En verandering kom
As nie om jou nie
Dan binne-in

 O duisendmaal dankie
Vir ‘n voorskrif
Wat selfs ekke
In al my eenvoud
Ook kan regkry!
 
Nie hoë berge klim
- van klip of van geloof  - nie
Nie moeilike voorskrifte
Met lang instruksies nie

 U vra eenvoudig
Net maar doen wat vanself sou kom
Net maar Hom loof
Wat reeds lofwaardig is

 Net maar Hom dank
Van Wie ek alles kry
Net maar Hom grootmaak
Wat dit reeds is

 En die wonder gebeur
My oog kyk op
En ek sien die glorie
Die almag en die lig

 En die golwe word kleiner
En die water onder my voete vaster
En ek vind: ek loop
Die stormsee ten spyt

 Dan het ek al die tyd tog geloof gehad
Ek wat so sukkel om te glo
Dan moet ek loof
Ek kan nie anders nie

deur Anne de Vos

Tuisblad | Oor ons | Nuutste Uitgawe | Vorige Uitgawes | Adverteer | Advertensiegids | Inteken | Gedigte | Briewe | Sosiale Netwerk | Stemmings | Kompetisies | Gebeure | Nuus | FAQs | Skakel Ons | Terme en Voorwaardes |
Privaatheidsbeleid | Grafiese Ontwerp en Webontwerp deur Kimia