Jou mishoring stem in vroegoggend klink
van ‘n dag vol velde en hardloop en wees
van blikkies en stokke en goeters wat blink
van saans kinderlag in die bad en
stilskemer se stories lees

As jy hande vuil kneukeltjies
om my werkdag-moeë vingers vou
Skryf ek woorde in my hart,
in jou kastele op die wolke
My wêreld stop hier
 by jou
in ‘n tydlose oomblik van hartseer en vreugde
woorde onnoembaar in tale
sonder hartstolke

My Seun, My Seun
Ek wonder wat jy in my sien
as jou ogies ophelder
vraend 
Wat jy so diep in my hart voel
as jy lê in die hol van my arm
vanaand

My Seun, Joshua, My Seun
Ek wonder of  jy van my weet
as ek saggies na jou kyk waar jy lê
in die donkermaan se lig
Ek wonder of jou skerp oortjies hoor
as ek soene op jou wange fluister
‘n seën uitspreek
oor jou gesig

Vir jou wil ek seën met elke wens wat jy vir my vervul
Seën met elke emosie wat jou stil armpies om my nek
uit my moeë hart wrig

Tuisblad | Oor ons | Nuutste Uitgawe | Vorige Uitgawes | Adverteer | Advertensiegids | Inteken | Gedigte | Briewe | Sosiale Netwerk | Stemmings | Kompetisies | Gebeure | Nuus | FAQs | Skakel Ons | Terme en Voorwaardes |
Privaatheidsbeleid | Grafiese Ontwerp en Webontwerp deur Kimia